गठबन्धन भत्काउने षड्यन्त्र सफल हुँदैन : अध्यक्ष प्रचण्ड

राजनीति

गृहपृष्ठ
राजनीति
गठबन्धन भत्काउने षड्यन्त्र सफल हुँदैन : अध्यक्ष प्रचण्ड

गठबन्धन भत्काउने षड्यन्त्र सफल हुँदैन : अध्यक्ष प्रचण्ड

आइतबार, फागुन १, २०७८ मुग्लानी खबर

पूर्वप्रधानमन्त्री तथा (नेकपा माओवादी केन्द्र)का अध्यक्ष पुष्पकमल दाहाल ‘प्रचण्ड’ले सत्तारूढ गठबन्धलाई भत्काउने प्रतिक्रियावादीको षड्यन्त्र सफल नहुने बताउनुभएको छ । सत्ताइसौँ जनयुद्ध दिवसका अवसरमा मधेस प्रदेश सरकारअन्तर्गतको मधेसी सहिद प्रतिष्ठानद्वारा आज जनकपुरधाममा आयोजित सहिद परिवारको सम्मान तथा राहत वितरण कार्यक्रममा अध्यक्ष दाहालले गठबन्धलाई अझ सुदृढ र सबल बनाएर लैजाने प्रयत्न भइरहेकाले प्रतिक्रियावादी तत्वको गठबन्धन भत्काउने षड्यन्त्र सफल नहुने बताउनुभयो ।

“गठबन्धन बनेदेखि नै प्रतिक्रियावादी, पूरा राजा महाराजा गठबन्धन भत्काउने षड्यन्त्रमा लागेका छन्”, अध्यक्ष दाहालले भन्नुभयो, “त्यो षड्यन्त्र अझै पनि जारी छ, तर हामी यो गठबन्धनलाई अझै सुदृढ बनाएर लैजाने प्रतिबद्धताका साथ अघि बढिरहेका छौँ, त्यसैले उनीहरुको त्यो सपना कहिले पूरा हुँदैन ।” संविधान नस्वीकार्ने तथा परिवर्तनलाई आत्मसात् नगर्ने तत्वले गठबन्धनलाई भत्काउने, निर्वाचन कार्यक्रमलाई बिथोल्ने र फेरि पनि मुलुकको वातावरणलाई धमिलो बनाउने प्रयास गरिरहेकाले सबै सचेत हुनुपर्ने उहाँको भनाइ थियो ।

“जनयुद्ध, जनआन्दोलन र मधेस आन्दोलनका बलमा पराजित भएकाप्रति क्रान्तिकारी प्रवृत्ति चुप लागेर बसेको छैन”, अध्यक्ष दाहालले भन्नुभयो, “त्यसले अझै पनि प्रतिगमन गराउने नै कसरत चलाइराखेको छ र त्यसलाई मलजल गर्न देशभित्र र बाहिर विभिन्न खालका प्रतिक्रियावादी शक्ति सक्रिय नै छन् ।”

संविधानको रक्षा, सङ्घीय लोकतान्त्रिक गणतन्त्रको कार्यान्वय र राष्ट्रियताको रक्षाका लागि गठबन्धन बनेको उल्लेख गर्दै अध्यक्ष दाहालले अझै गठबन्धनलाई निरन्तरता दिनुपर्ने कुरालाई गठबन्धनका साथै नेताहरुले बुझेकाले तत्काल गठबन्धन नटुट्ने दाबी गर्नुभयो ।

प्रदेशको नाम मधेस प्रदेश कायम गर्ने र पहिलो पटक औपचारिकरूपमै ‘जनयुद्ध’ दिवस आयोजना गरेर मधेस प्रदेश सरकारले ऐतिहासिक स्वागतयोग्य काम गरेको भन्दै उहाँले यसबाट देश र विदेशलाई नयाँ सन्देश गएको बताउनुभयो ।

नयाँ आन्दोलन र अभियानका लागि सङ्कल्प लिने आएको जिकिर गर्दै उहाँले सङ्घर्षका लागि ऊर्जा प्राप्त गर्न मधेसी जनताका बीचमा जाने पार्टीले निर्णय लिएको सुनाउनुभयो । जनयुद्धको थालनी मधेसबाटै गरेको प्रसङ्ग उल्लेख गर्दै अध्यक्ष दाहालले आवश्यक परे पुनः मधेसी जनताका बीचमा जाने र ऊर्जा प्राप्त गर्ने योजना रहेको बताउनु्भयो ।

कार्यक्रममा मधेस प्रदेशका प्रदेश प्रमुख हरिशङ्कर मिश्रले सहिदको बलिदानीबाट प्राप्त भएका उपलब्धिको रक्षा गर्दै आर्थिक समृद्धि र समानताका लागि सबै दल एकजुट हुनुपर्ने बताउनुभयो ।

सो कार्यक्रमलाई भर्चुअल माध्यमबाट सम्बोधन गर्दै मधेस प्रदेशका मुख्यमन्त्री लालबाबु राउतले ‘जनयुद्ध’का कारण मुलुकमा सङ्घीय लोकतान्त्रिक गणतन्त्र आएकाले यसलाई सरकारले महत्वका साथ लिएको बताउनुभयो ।

सहिदको बलिदानीबाट प्राप्त उपलब्धि संस्थागत गर्न प्रदेश सरकार प्रतिबद्ध रहेको भन्दै मुख्यमन्त्री राउतले सहिद परिवारको सम्मानमा प्रदेश सरकारले कुनै कञ्जुस्याइँ नगर्ने बताउनुभयो ।

सो कार्यक्रममा नेकपा माओवादी केन्द्रका स्थायी समिति सदस्य तथा पूर्वमन्त्री मात्रिकाप्रसाद यादवले प्राप्त उपलब्धिको रक्षा गर्न र आगामी कार्यभार पूरा गर्न मुलुकमा माओवादी आवश्यक रहेको बताउनुभयो ।

न्यायालयको शुद्धीकरणका लागि प्रधानन्यायाधीशविरुद्ध महाअभियोग लगाइएको दाबी गर्दै उहाँले यसबाट न्यायालयभित्र रहेको बेथिति र विकृति अन्त्य हुने बताउनुभयो । शिक्षा विज्ञान तथा प्रविधि राज्यमन्त्री बोधमाया यादवले जनयुद्धलगायत विभिन्न आन्दोलनका क्रममा सहिद भएका सबैलाई सहिद घोषणा गर्नुपर्ने बताउनुभयो ।

कार्यक्रममा प्रदेश सरकारका भौतिक पूर्वाधार विकासमन्त्री रामसरोज यादव, उद्योग, वन तथा पर्यटनमन्त्री सत्रुधन महतो, आन्तरिक मामिला तथा सञ्चार राज्यमन्त्री रुवि कर्णले सशस्त्र द्वन्द्व, जनआन्दोलन र मधेस आन्दोलनबाट प्राप्त भएका उपलब्धिलाई संस्थागत गर्दै मुलुकको आर्थिक समृद्धिका लागि दलीय एकता जरुरी रहेको बताउनुभयो ।

आन्तरिक मामिला तथा सञ्चारमन्त्री तथा मधेसी सहिद प्रतिष्ठानका अध्यक्ष भरतप्रसाद साहको अध्यक्षतामा आयोजित कार्यक्रममा अध्यक्ष दाहालले सशस्त्र द्वन्द्वका क्रममा सहिद भएका ४० जनाको परिवारलाई जनही रु एक लाख नगदसहित सम्मान गर्नुभयो ।RSS

प्रकाशित मिति: आइतबार, फागुन १, २०७८

प्रतिक्रिया दिनुहोस्