दोहा, कतार।
"भाषाको उत्थान नेपालीको पहिचान, सचेत र शिक्षित समाजको निर्माण हाम्रो अभियान" भन्ने मूल नाराका साथ कतारमा साहित्यिक कार्यक्रम हुने भएको छ । आदिकवि भानुभक्त आचार्यको २१२ औँ जन्म जयन्ती समारोह-२०८३ को पावन अवसर पारेर यहाँ प्रख्यात गजल गायक राज सिग्देलका साथमा विशेष "सुमधुर गजल साँझ" कार्यक्रमको आयोजना गरिने भएको छ।
नवोदित साहित्यिक वाचनालय तथा अन्तर्राष्ट्रिय नेपाली साहित्य समाज (अनेसास) कतार च्याप्टरको आयोजनामा आगामी जुलाई १७ तारिखका दिन भव्य कार्यक्रम तय गरिएको हो।
कार्यक्रमका मुख्य आकर्षणहरू:
१८औँ अधिवेशन: नवोदित साहित्यिक वाचनालय कतारले आफ्नो १८औँ अधिवेशन सोही अवसरमा सम्पन्न गर्दैछ।
१७१औँ वाचन डबली: अनेसास नवोदित साहित्यिक वाचन शृङ्खलाको १७१औँ कडीका रूपमा विशेष साहित्यिक वाचन डबली सञ्चालन हुनेछ।
पुस्तक विमोचन: अनेसास केन्द्रद्वारा प्रकाशित तीन महत्त्वपूर्ण कृतिहरू ‘धराका सितारा’, ‘छन्दगुञ्जन’, र ‘संस्कृतिको सिरानी’ को विशेष लोकार्पण (विमोचन) गरिनेछ।
सुमधुर गजल साँझ: कार्यक्रमको साङ्गीतिक तथा साहित्यिक आकर्षणका रूपमा प्रख्यात गजल गायक राज सिग्देलका साथमा विशेष "सुमधुर गजल साँझ" प्रस्तुत गरिनेछ।
कार्यक्रम १७ जुलाई, २०२६ (शुक्रबार),साँझ ६:०० बजेदेखि राति ९:३० बजेसम्म वेलफेयर रेस्टुरेन्ट, प्लाजा मल, सनैया (कतार) को सभाहलमा सम्पन्न हुने छ ।
आयोजकले कतारमा रहनुभएका सम्पूर्ण साहित्य अनुरागी, बौद्धिक व्यक्तित्व, सामाजिक अभियन्ता, पत्रकार तथा नेपाली दाजुभाइ तथा दिदीबहिनीहरूलाई कार्यक्रममा उपस्थित भई कार्यक्रमको शोभा बढाइदिनुहुन हार्दिक निमन्त्रणा एवं अपिल गरेको छ।
