दोहा । वैदेशिक रोजगारीका क्रममा कतारलाई कर्मथलो बनाउँदै आएका पर्वतको जलजला गाउँपालिकाका बासिन्दाहरूको साझा मञ्च ‘पर्वत जलजला समाज कतार’ ले आफ्नो तेस्रो स्थापना दिवस तथा दोस्रो महाधिवेशन भव्यताका साथ मनाएको छ । महाधिवेशनको आन्तरिक सत्रबाट जलजला–३, मल्लाजका देभाराज कार्कीको अध्यक्षतामा १७ सदस्यीय नयाँ नेतृत्व निर्विरोध चयन गरिएको हो ।
नवगठित समितिको वरिष्ठ उपाध्यक्ष पदमा सूर्यबहादुर खत्री चुनिएका छन् भने उपाध्यक्षको जिम्मेवारी अमरबहादुर जिसी र बेलबहादुर कार्कीले पाएका छन् । यसैगरी, महासचिवमा बाबुराम नेपाली, सचिवमा दिनेश मल्ल, कोषाध्यक्षमा क्षेत्रबहादुर जिसी र सहकोषाध्यक्षमा कर्णबहादुर परियार चयन भएका छन् । समितिको सदस्यहरूमा लोकबहादुर खत्री, सन्दीप भण्डारी, फौदबहादुर कार्की, निलकण्ठ सुवेदी, रवि मल्ल, दिलबहादुर खत्री, रितबहादुर नेपाली, बुद्धिमान नेपाली र लालबहादुर क्षेत्री रहेका छन् ।
शुक्रबार कतारस्थित प्लाजा मलको मेस्काफे रेस्टुरेन्टमा आयोजित औपचारिक समारोह अध्यक्ष कार्कीको अध्यक्षता तथा ग्लोबल पर्वत समाजका मध्यपूर्व संयोजक रघुनाथ शर्माको प्रमुख आतिथ्यमा सम्पन्न भएको थियो । उक्त भेलामा कतारमा सक्रिय रहेका विभिन्न प्रवासी नेपाली संघसंस्थाका अगुवा तथा प्रतिनिधिहरूको बाक्लो उपस्थिति देखिएको थियो ।
समारोहलाई सम्बोधन गर्दै प्रमुख अतिथि शर्माले यो संस्था अन्य कुनै संगठनको विकल्प वा प्रतिस्पर्धीका रूपमा नभई विशुद्ध परोपकारी भावनाले स्थापना भएको प्रस्ट पारे । जलजलावासीको एकताबाट जन्मिएको संस्थाले समाज कल्याणका निम्ति अन्य निकायहरूसँग हातेमालो गर्नुपर्ने उनको भनाइ थियो । संस्थाले एउटै कार्यकालमा ५० हजार कतारी रियालभन्दा माथिको कोष परिचालन गर्न सक्नु गौरवको विषय भएको बताउँदै शर्माले यस्ता रचनात्मक अभियानलाई निरन्तरता दिन आग्रह गरे ।
औपचारिक कार्यक्रमसँगै प्रस्तुत गरिएका विविध सांस्कृतिक झलकले उपस्थित दर्शकलाई भरपूर मनोरञ्जन प्रदान गरेको थियो । स्थानीय नेपाली कलाकारहरूको बेजोड गायन तथा नृत्य प्रस्तुतिले वातावरणलाई निकै रोचक बनाएको थियो । सोही अवसरमा समाजका ज्येष्ठ व्यक्तित्वहरू र सहयात्री संस्थाहरूलाई कदरपत्रसहित सम्मान अर्पण गरिएको थियो । स्थानीय तहको संगठनले आयोजना गरेको कार्यक्रम भए पनि भव्य व्यवस्थापकीय कौशल र उत्साहजनक सहभागिताले जिल्लास्तरीय बृहत् सम्मेलनको आभास दिलाएको थियो ।
समारोहको अन्त्यमा बोल्दै सभापति कार्कीले बितेको कार्यकालमा साथ र हौसला प्रदान गर्ने सम्पूर्ण सहयोगी मनहरूप्रति कृतज्ञता ज्ञापन गरे । उनले आउँदा दिनमा कतारमा रहेका अन्य सामाजिक संस्थाहरूसँग समन्वय विस्तार गर्ने र मातृभूमि नेपालमा आइपर्ने दैवी प्रकोप तथा संकटका बेला मानवीय सहायता जुटाउने कार्यमा संस्था सधैँ अग्रपंक्तिमा रहने दृढता व्यक्त गरे ।